المنتدى التونسي موقع الأخبار التونسي 
دعت الأستاذة الجامعية الاستشفائية المبرزة في المناعة بمعهد باستور تونس، سمر صمود، اليوم الأحد 27 جوان 2021، إلى ضرورة إعلان حالة الطوارئ الصحّية وطلب النجدة الدولية و فتح كل المسالك الديبلوماسية لجلب التلقيح في الإبان”.
وقالت الدكتورة سمر صمّود، في تدوينة على صفحتها، بموقع التواصل الاجتماعي فايسبوك، ”التلاقيح نشريوها بفلوسنا أما تستعمل كل الوسائل الديبلوماسية لجلبها وكان تصير إرادة حقيقة، و العالم يقتنع بمساعدتنا كلنا نلقحوا في ضرف ثلاثة أشهر والتوانسة الكل يقيدوا وأنا متحققة من هذا”.
وأضافت: ”تونس الاستثنائية الي تحصلت على جائزة نوبل للسلام يجب أن تستفيق من سباتها العميق وتعيد طرق كل أبواب العالم لجلب التلقيح”، معتبرة أن ”هناك جريمة ترتكب في حق المواطنين التونسيين”.
وفيما يلي نص التدوينة:
يظهر لي وقيت بش الثلاثي الي شادد الحكم يؤخذ الأمور بغاية الجدية
يعلن حالة الطوارئ الصحّية ، يطلب النجدة الدولية و يفتح كل المسالك الديبلوماسية لجلب التلقيح في الابان
نشريوها بفلوسنا أما تستعمل كل الوسائل الديبلوماسية لجلبها.
مش نستناو هو مليون بش يجي مع صابة القمح و الآخر مع اوسو و الاخر ما نعرفش وقتاش !
رانا منجيوش نهج في الصين !
كان تصير إرادة حقيقة، و العالم يقتنع بمساعدتنا كلنا نلقحوا في ضرف ثلاثة أشهر ! و التوانسة الكل يقيدوا و انا متحققة من هذا !
تونس الاستثنائية الي تحصلت على جائزة نوبل للسلام لازم تفيق من سباتها العميق و ترجع تطرق كل أبواب العالم و تجيب التلقيح !
اليوم فما جريمة ترتكب في حق المواطنين التوانسة !
و راهو يا سيد رئيس الحكومة باهي كي تفسر الي التلقيح بجرعتين يحمي من الحالات الخطيرة و انت مثال
أما راهو استفزاز كبير وقتلي 23,6% من التوانسة مقيدين في منظومة EVAX فقط 10,5% تلقاو جرعة منهم 4,23% تحصلو على الجرعة الثانية ، خاطر هاذم مواطنين توانسة مقتنعين و مقيّدين في المنظومة أما ما لقحوش خاطر ما فماش تلاقيح !
المواطنين هاذم خايفين ، على أنفسهم ، أما كذلك على عائلاتهم و على صغارهم ، و راهو لازم تعرفوا إلى الصغار زادة فوق ال12 سنة عندهم الحق في التلقيح في العالم و عن قريب الي اصغر
خاصة إلى بالسلالات الجديدة تمس كل الفئات العمرية و كلها معرضة للعدوى و الحالات الخطيرة مع التنسيب و الاولويات بالطبيعة ! و الي الجرعتين لازمين للحماية من الحالات الخطيرة و القاتلة
بالنسبة للزوز رؤساء الآخرين الحقيقة ما نعرفش كان في بالهم الي فما كورونا اصلا !
واحد نتفكروا في بالو كورينا
#24مليون_جرعة_تلقيح
