الفنانة شهرزاد هلال “الحاضر يعلم الغايب و من غير الحاح البرامج متاع المبتدئين اللي يخدمو رعواني ما عادش تستدعاوني”

كتبت المطربة شهرزاد هلال تدوينة على حسابها الخاص على الفايسبوك انتقدت فيها كواليس حضورها في أحد البرامج التلفزية وقد لمحت لعدم مهنية فريق برنامج الفاميليل على قناة نسمة الجديدة والذي تقده كل من إيمان العبيدي وعزيزة الحسيني.

ووجهت شهرزاد هلال رسالة للاعلاميين بعدم استضافتها مجددا وخاصة المبتدئين على حد تعبيرها

“يستدعاوك لبرنامج و يقرقوا بيك باش تقبل الدعوة و انت تلقاك ما عينكش باش تحضر خاصة اذا كلموك قبل بنهار يعني يلزمك تعمل المستحيل باش تبرمج لبسة خاصة بالبرنامج. نهار التصوير تجي في الوقت تقعد تستنى ساعتين حتى يكملوا من دزان البيدق باش يبداو التورناج و بالطبيعة تلم دبيشاتك و تقلهم مروحة ما نجمش نستنى يجيو يلحلحوا بيك هاو تو باش نبداو اللي بعدها لازمك تزيد ساعة أخرى مستنية و مبعد تصور معاهم ساعة تجي تتفرج تلقاهم ما خلاو كان درجين تغني 3 غنايات تلقاهم خلاولك وحدة. بربي علاش داخلين للاعلام و بآش و علاش تبداو تلحلحوا بيا باش نحضر أيا تو الحاضر يعلم الغايب و من غير الحاح البرامج متاع المبتدئين اللي مازالوا يتلمسوا في طريقهم و اللي يخدموا رعواني ما عادش تستدعاوني أنا راني مش محتاجة ليكم و حضوري في برامجكم مزية مني أنا في غنى عنها أما حاجة برك تغيضني كيف تلقى فنان كبير و عندو تاريخ فني مضحي معاكم موسم كامل ربي معاك الفنان القدير هشام رستم اللي كان في غاية اللطف معايا.”