منال عبد القوي توضح حالة ‘فايزة المحرصي’ الصحية : “لبعض الفنانين يزّيو مالركوب على حدث مرض فايزة بش تظهروا أبطال”

كتبت الممثلة ‘منال عبد القوي’ تدوينة عبر حسابها الخاص على الفايسبوك، تنتقد فيه ما اعتبرته محاولة الركوب على مرض صديقتها الفنانة فائزة المحرصي للظهور الاعلامي على حسابها، كما طمأنت الجمهور العريض بأن الحالة الصحية مستقرة وبأن فائزة لازالت تتلقى العلاج.

“

توضيح حول حالة اختي الفنانة “فايزة المحرصي”

صباح النور أحبابي واحباب فايزة وكلّ من يحبّها، بربي بعض الزملاء الفنانين تعرفوا رواحكم شكون يزّيو يزّيييييوا مالركوب على حدث مرض فايزة بش تظهروا أبطال، كلّ. مرّة خارجين تفجعوا في العباد بكلام بش يعيطولكم الاذاعات والتلافز وانتوما مشيتولها مرتين برك، ديجا الزيارة ممنوعة عليها ، الكوفيد رجع ونخافو عليها اللطف مالجراثيم ، عيب راهو كيف تخرجوا تحكيوا من الفيسبوك الاذاعات للتلافز تعملوا فيالبوز، والي يعمل الباهي راهو مايهبطوش عالفيسبوك

فايزة حاليا معاها أختها وصاحبة عمرها”فوفة” حتى حنان ماعادش تنجم تمشيلها كيف قبل خوفا من ازعاجها وزيد حنان تخدم ربي يعينها وتحتك بالناس تخاف لا يقدر كيف تكثر من زيارتها تتعبها، زوز مالناس مع فايزة اختها “اختي فتحية” وفوفة صاحبتها فقط فقط فقط ، حتى أنا والفة بن رمضان وصاحباتها المقربين رانا بالتلفون بش ما نتعبوهاش، وراهي فايزة حالتها مستقرّة واليوم بركة تضحك على كلامي فيالتلفون كيف أنا نطلب في فوفا ، نضحّك فيها بالجربي، فائزة تاكل وتشرب وتعالج وحالتها مستقرة والفرج على ربي ، بالله. يا بعض الزملاء ماتهوّلوش الامور، أحنا كلنا نحبوها وكيف نقولوا للناس ادعيولها خاطر ربي رحيم كريم والي عنده مش بعيد ، أي نعم ادعيولها وكثفوا مالدعاء خاطر ربي الحنان المنان يستجيب لدعواتكم الصادقة.

الاهم قد بلّغت اللهم فاشهد .”