المنتدى التونسي موقع الأخبار التونسي 
بعد أن انتقد عدد من الصحفيين على شبكات التواصل الإجتماعي، استضافة صاحب مقولة “سكرلي البرنامج سي علاء” وماتكرسه هاته النوعية من البرامج من إنحطاط وانحلال أخلاقي ومن بينهم الصحفية نعيمة الشرميطي، قام الاعلامي نوفل الورتاني بالرد على المباشر عبر برنتمج ديما لباس على راديو ديوان أف أم قائلا
“نعيمة الشرميطي رايك نحترموه لكن شكون قاعد يعمل في اعلام الثقافة ؟ أنت نعيمة؟ ، أنت حتى عملت فقرة في التلفزة تقول فيها روبة مزيانة ولا موش مزيانة … 90% من تونس اعلام مزابل ، خاطر انتوما رديتوه مزابل … هو اعلام دردشة في كل دول العالم ، Cyril Hanouna ناجح بالناس يعمل في دردشة متاع وجوه معروفة وموش معروفة … أعطيوني حصة تثقف في تونس ؟ تحب ولدك يتثقف بالتلفزة وأنت لا تشريلو كتاب ولا تهزو يقرا ، علاش تحبونا منافقين ؟ … لكلو اعلام دردشة مافما حد جاب دكتورا ولا صنع صاروخ لكلنا كيف بعضنا لكن باختلاف درجات ، وهذا في كل دول العالم البرامج هذي تعمل نسبة مشاهدة والبرامج الثقافية لخرى يحطوها في اخر السهرية … المواطن يتفرج في التلفزة للأخبار وللترفيه في كل دول العالم والبرامج الثقافية حتى كان موجودة مايتفرج فيها حد … سكرلي البرنامج شنوة المشكل كي عاودو استضيفوه الراجل”.
وقد ردت نعيمة الشرميطي عبر حسابها على الفايسبوك عن ماقاله الورتاني في حقها حيث كتبت:
“أصدقائي صباح الخير …. بالنسبة للي قالوا فيا الزميل نوفل الورتاني اللي نحترموا ووجعني بكلاموا البارح و مُحاولة تقزيمه لمسيرتي المهنية و هو أكثر واحد يعرف و يشيد بكفائتي ( ما فهمتش علاش يعمل هكا ) راني مانيش نادمة و مازالت مصرة بوصف ما يحدث بإعلام المزابل و سقط المتاع و حثالة المجتمع من زمرة الدخلاء و الدخيلات( هات أنستغرامك و ايجا و ناس ما عندها حتى إضافة بخلاف مدان وجوهها حتى ولات محور تندر المجتمع التونسي )
الناس الكل تعرف مواقفي المبدئية فيما يخص قطاع الصحافة و الإعلام ولأني باش ننزل للحضيض الأخلاقي كيف برشا حثالات تتصدر المشهد و تعطي في الدروس و هوما غاطسين في التحيل و التحرش و ممارسة العنف و كان يكنسوا قدام ديارهم خيييير …
مسيرتي مازالت مكملة و نكتب و نفهم في كل شيء)))
نهاركم زين و شكرآ من الأعماق للناس الباهية اللي تضامنوا معايا….”.
