المنتدى التونسي موقع الأخبار التونسي 
علقت الممثلة التونسية ،سوسن معالج ،على نهب الشاحنة المحملة بالبيرة في منطقة لاكانيا بتونس العاصمة و التي أثارت جدلا كبيرا على مواقع التواصل الاجتماعي .
و أضافت المعالج قائلة :مافهمتش اين الغرابة في حكاية كميون البيرة ؟
“التوانسة اغلبيتهم يموتو ع البوبلاش ، التفتيف و التقحيف و الطمع اصبح رياضة وطنية في ظل انهيار المقدرة الشرائية، والجعة معروفة منذ سنوات اصبحت آخر معاقل البهجة في البلاد للشيب والشباب على حد السواء
و هذا ليس حكرا على الطبقات المفقرة، الشي هذا مستفحل حتى عند الاغنياء، عادي يهبط طاولة بمليون و يحسد السارفور في عشرة الاف بوربوار
معروفة الفازة تقول انت نساء تهز في البيرة؟
وهو ثم مرا ما عندهاش ولدها ولا راجلها يعمل كعبات؟ وهي شكون سند البطال في تونس ؟ مش امو و مرتو؟
وزيد فيبالكم الي ما ثماش تونسي يشرب وما يحبش مرتو تشاركو كي يعمل قعدة في الدار (موش قدام الناس طبعا )
باهي تعرفو قداش من مرا طلقها راجلها خاطرها كبي و عاقلة وما تحبش تعمل جو معاه ولا ما فيبالكمش؟
تقول انت محجبة و تهز في البيرة؟ كل حاجة في بلاصتها، معروفة الفازة، اغلبية التوانسة يسكرو و يصليو ، يجي رمضان يبطلو و يكبو الجبايب يمشيو للتراويح ، يجي العيد نرجعو لا سو لا سوية، ياخي مش هذا مفهوم الاعتدال و الحرية و الكرامة الوطنية الي بعتوهولو و قلتولو من اجلو عملنا ثورة؟
مش هذا النتاج الطبيعي و المنطقي لشعب فقستولو مرارتو بالنموذج التركي السمح المعتدل على مر سنوات من القلوب و حريم السلطان واركيلة و فولارات ودجينات سليم وحجاب شطر لفة عليه ماكياج 6/12؟
هذا هو المشروع الثقافي و الحضاري الي بعتوه للشعب توا عشرة سنين فلاداعي للبهتة اليوم و موش لازم تعملو رواحكم مصدومين ، تنجمو تتصدمو مالجوع الي استفحل في البلاد مثلا ، ولا من التطبيع مع السرقة و مع الحرقة مثلا، أما بربي ، عرّضتلكم الجاه أخطاونا يعيشكم من نمنامة المرا والراجل مانا جربناها إبان الثورة و ما نجحتش ولن تنجح لسبب بسيط هو كونو الفقر و الميزيريا والكبت و الجوع و الحرمان
الكلهم لا جنس لهم”.
وأقدم بعض الأشخاص في منطقة لاكانيا بتونس العاصمة ،يوم الاثنين 2 جانفي 2023 ، على نهب شاحنة محملة بالبيرة حيث تداول مستخدمي مواقع التواصل الإجتماعي، الفيديو و الصور بكثافة للشاحنة التي توقفن اثر عطب مفاجئ .
و قد ندد العديد من التونسيين بما اقترفه عددا من المواطنين داعين الأمن إلى التدخل .
