المنتدى التونسي موقع الأخبار التونسي 
أعلن المخرج هيفل بن يوسف عن قبول التلفزة الوطنية لمسلسله الجديد ‘باب الرزق’ والذي سيعرض رمضان القادم، والمسلسل سيناريو وحوار محمد علي دمق وإخراجه.
وكتب هيفل بن يوسف تدوينة عبر فيها عن سعادته بقبول عمله الدرامي بعد أعمال سينمائية سابقة
” نعم لقد فعلتها يا أمي …
نعم لقد فعلتها ..
تتذكر كنتلمو عالتلفزة في رمضان بعد شقان الفطر و نتفرجو على الخطاب عالباب و منامة عروسية و الدوار و عودة المنيار و قمرة سيدي محروس …
رمضان السنا بشتتفرج على مسلسل من إخراج ولدك ..
إي أك السيناريو لجبتهولك تقراه .. تمت الموافقة عليه ..
إي نعم شهر عشت فيه الويل بش خذيت الموافقة النهائية .. لا رقدت لا كليت ونا نشوف و نسمع في العجب..
لوبيات.. و كمامص.. و حكايات تضحك.. من ناس بعاد و حتى قراب …
نشكر مجلس إدارة التلفزة الوطنية ولي كانت في أعلى درجات الحرفية و الشفافية في تعاملها معنا.
و مع الملف ..
نشكر لجنة القراءة لدافعت على عمل مكتوب مليح..
معاش وقت ..
معاش وقت جملة …
الله غالب بلادنا ديما تخليك آخر وقت .. و توا وقت خدمة و
ثنيان الركبة …
بشنحطو الكل في الكل بش كما عودناكم في IRIS خدمنا ديما تعجب و تكون في المستوى .
مسؤولية كبيرة على عاتقي .. بش نوريو للمسيرين أنو الشباب لبنى روحو بروحو ينجم يوصل و يخدم و حافظ على المال و الذوق العام . و يبدع فنيا كتتوفرلو حتر ربع الظروف .. .
ثمنية سنين وحن نشاركو في طلبات العروض متع رمضان ..
إي نعم ثمنية سنين !!!
بأعمال ممتازة .. و كل عام نكتبو عمل جديد ووورشة و تعب و مصروف …
و هاي التاسعة تمت ..
خاطر ديما نقوللكم “الدوام ينقب الرخام”
معاش انجم نحكي أكثر..
فرحان … فخور .. و واعي بالشانطي لكبير ليستنا فينا.
نوعدكم بعمل في مستوى انتظاراتكم .. و نوعد لحبو يعرقلونا الكل انو معدناش وقت ليهم.
” باب الرزق ” مسلسل من عشرين حلقة .. على القناة الوطنية الاولى ..
تنفيذ الإنتاج: iris
فكرة و سيناريو و حوار : محمد علي دمق
ساعد على الكتابة : هيفل بن يوسف
مديرة الإنتاج: هاجر صبري
إخراج: هيفل بن يوسف
أك الطفل الجربي المهبول لعمل ثلاث أفلام و حدو .. و شارك في ال jcc اربع مرات .. و خذا جوايز واعمل معارض الداخل و البرة ..
أك الشركة لبدات بجهاز حاسوب و كامرا وسط لبلاد و ولات الشريك المفضل لمنظمات و علامات كبيرة في تونس و خارجها ..
احلمو … مافما شي مستحيل.
هذا انتصار للناس لتشبهلنا الكل ..
للمحارببن …
و ختاما .. مساج شخصي لشخص معين :
ممكن معدناش فلوسك و علاقاتك كما قلت انتي .. أما عدنا حاجات ماتتشراش بالفلوس.
عدنا الخدمة و الموهبة و محبة الناس …
مرة أخرى نشكر إدارة التلفزة على الثقة .. و تأكدو بشنكونو قي المستوى و أكثر.
بفريق تقني شاب ضربت عليهم بالبونية بالواحد!!! و متعطشين بش يوريو شعندهم “.
