المنتدى التونسي موقع الأخبار التونسي 
علقت الفنانة منال عبد القوي عبر حسابها الخاص على الفايسبوك عن ماوقع للفنان لطفي العبدلي أمس في مهرجان صفاقس الدولي، حيث انسحب الامن بعد نصف ساعة من انطلاقة العرض واستغاثة العبدلي ومنتج العمل أن ماوقع هو محاولة تصفية جسدية له.
وقالت منال أنها اليوم أصبحت تخاف على حياتها لانها فنانة وأن السياسة اليوم فرقتنا كتونسيين وهو أمر خطير على حد تعبيرها
“أوّل مرّة نوصل نخاف على حياتي لانّي فنّانة!!!!
تونس بلد الديمقراطية والحريّات يستغيث فيها فنّان من على الركح ويقول ان حياته في خطر!!!! حماية المواطن مهما كانت مهنته من مسؤوليات هذا البلد … آه يا بلد
وصلنا لمرحلة من التفرقة بين ابناء الشعب التونسي بسبب التعصّب الأعمى لشنوّة ؟؟ لاااا ماعادش للكورة طاحت موضتها ,للسياسة أي نعم ، كل جهة تألّه “سياسي(ة) ويا ويل الي يقولّو حتى رحمك الله وهو مش من انصاره !!! وين ماشيين وين وصلنا وين وصلتونا ، فرقتونا وخوفتونا وكرهتونا في بعضنا!!! لطفي العبدلي بو زوز صغار ، محمد بوذينة المنتج متعو الي تعرّض للعنف الشديد كذلك بو ومواطن تونسي!!!
معناها شنوة يعمل فنان عنده موقف سياسي يطلع يحكي على تكاثر أنثى البطريق؟؟؟
السياسة القذرة اليوم فرقت الشعب التونسي وحطّت حياة مواطنين في خطر خاطر عبروا على رايهم ، وبربي جماعة حتى هو كثرلها وجلطام ويجبد في الشبوك نقوللكم بالنسبة للطفي العبدلي بالذات هذاكا ستيلو وهاو يقرا ، قبيح و نبّار وكلمته على لسانه لا وبالكم تظنّوا الخصم السياسي ساكت مسكين وعويقل وخاطيه، ابدا وراسكم ماكينات تخدملو ضد أي حد يجبدو خلّي عاد كيف يبدا نجم !!! مش كان لطفي في خطر راهو بلّي قاعد يصير للفنانين هالفترة تونس في خطر
حمدالله على سلامتك لطفي ربي يحفظك لصغيراتك وجمهورك الي قعد معاك لاخر لحظة ، اللطف عليك محمد بوذينة ونشالله لاباس خويا
والي يقولي كثرت مالتضامن نقولو راني شريت بنك التضامن مؤخرا .
فمة مثل مصري يعجبني: أنا وخويا وولد عمي عالبراني وأنا وخويا على ولد عمّي، تنجموا تشوفوا الفنانين ماكلين بعضهم أما راهو كيف توصل الامور هكة مانجّموا نكونوا ألا يد واحدة
يا تونس يا تونس يا تونس”
